موقف هزني من الأعماق

لن أثرثر كثيرا وأتفلسف وأنمق العبارات هو فقط موقف أثر فيني وأحببت تجسيده لكم…..

مريت مرة  ع مطعم وطلبنا عشاء ..واحنا بانتظار الطلب يخلص ..جانا ولد صغير يمكن عمره 13او14 سنة..ولاصق فينا طول الوقت يبغى فلوس واحنا مطنشين ..وهو يقول بس ريال !!

بصراحة كسر خاطري وفكرت أعطيه وبعدين اتراجعت.. -لأني ماأحب اشجع على انتهاج هذاالأسلوب في كسب المال- ..تجاهلت مشاعري وطنشته..لكن ماما حزنت عليه وقالت بأعطيه بس خايفه يلعب فيها في شي مو كويس..وبعد تررد سألناه اش تبغى بالفلوس؟؟

قال أبغى آكل شاورما جوعان   !!!

المهم اشتريناله عشاء واعطيناه ..اخذه وجلس متقوقع ع نفسه فوق درجة المطعم..وبدأ ياكل بكل براءة…

منظره من جد خلاني أحتقر نفسي وأكرهها.خلاني اشوف الناس من زاوية تانية..خنفتني العبرة وغرقت عيني دموع حرقة وقهر ع حاله..

أي شي نبغاه نقدر نجيبه ونوفره بكل بساطه..وهذاالمسكين جوعان وموقادر يوفر حق أكله

والله إني أكتب والعبره خانقتني.. تمنيت تكون معايا كاميرا وقتها عشان أصوره واحتفظ بصورته عندي

من جد موقف أثر فيني

الله يرزقنا ويرزقهم ويرزق جميع المسلمين مايتمنون ويبارك لنا فيما رزقنا

دنيا عجيبة!!

سأتحدث اليوم بشكل موجز عن أبرز المواقف التي حصلت في“ا لمدينة االمنورة” وجعلتني أدون هذا الموضوع

أولا: رحلتنا كانت عن طريق” باصات النقل الجماعي“وكانت تجربة فريده من نوعها وأول مره أجرب وأركبه..الباصات كانت لابأس بها..جييده نوعا ما وفيه باصات فخمة وجديده وتفتح النفس ..بس مالقينا مكان فيها

المهم..أول موقف حصل في الباص قبل مانمشي..

( بنت صغيرة جالسه وجنبها كم كرسي فاضي..فسألها واحد : دا الكرسي لحد ولالا ؟

قا لت لا..جلس..دخلت الام ووقفت في وسط الباص وشافته يكلم بنتها ضربت بصوتها كله في وجهه الرجال :ماترفعش صوتك على بنتي..

قلها:مارفعتوش.دنا سألتها بأدب بتاعك ولالا..

الأم:قلت لك ماترفعش صوتك على بنتي.دنا باتكلم معاك باحترام..

زوجة الرجل:ماترفعيش صوتك ع الراجل..ا

لأم مالكيش دعوة انت..مش شايفاه بيرفع صوته على بنتي ويشخط فيها.وشوية ينزل يضربها!!..

الزوجة:قلت لك ماترفعيش صووتك ع الراجل وهو ماغلطش..دا جوزي وبدافع عنه..ويعني هدا الادب اللي بتقولي عليه؟؟ ونعم الادب يختي..

جا المشرف من المكتب وحاول يهديء الموضوع تقوم تشخط فيه وتقول بناااتي بيصرخ عليهم وشويه يضربهم دول أمانة في رقبتي..وانا مسؤوله عنهم

وترد عليها زوجته:يختي احترمي نفسك وماترفعيش صوتك ع الرجال……

حاولو الرجال يهدوا الوضع لكن مافي فايدة..خرج المشرف وهو يقول”حريم ماوراكم الا الشر”أو ماشابهه<<هع

في الأخير لمن سكت الرجال ومراته قالت الأم لبنتها:قومي يابتني اروح اقعد في باص تاني احسن من رفيق السوء ده..اقعد استنى اربع وخمس ساعات ولا امشي مع رفيق السوء.الرفيق قبل الطرييق..ونزلت وهي تردد هذه المقولة المأثورة”الرفيق قبل الطريق”  _ربي كفانا شرها_اعوذ بالله

بصراحة الرحلة كانت ممتعة ومتعبه نوعا ما..تجربة واستفدنا منها

قابلت في طيبة الطيبة وحده من المدونات العزيزات فكان لقائي بـ رجاء ممتع جدا ..مافلينا مزبووط يارووجه

*الموقف التاني حصل في أسواق المدينة

طبعا كانت الدنيا زحمة وأغلبها من الاهالي ..و كالعادة نزلنا السوق..و (ماشيه مع اخواتي وبنات خالي  نتسوق ونشتري..السوق زحمة نوعا ما..والهيئة تدور…و كان ماشي ورانا 1 من رجال الهيئة و2 عساكر.. وطول ماهو ماشي..(غطي يامرهـ ..تحجبي.. تستري)..كملنا ودخلنا محل نشتري..وقف قدام المحل وهو يقول (تغطي يامرهـ)..لمن شافنا مطنشين-لاننا مغطين ومتحجبين-قالي البسي عباية ع الراس..نرفزني..بس طنشته ومالتفت له..لأن عبايتي من وسعها تدخل 10 معايا وفوق هذا يقول عباية ع الراس مدري اش يبغو بس!!..المهم رحت محل تاني واهلي لسه بيشتروا من المحل اللي خرجت منه..رجع الشيخ لنفس المحل ووقف قداامه بعصبية وبأعلى صوووت..(غطي يافاسقة..يافاجرة..اتقي الله..وخافي ربك..كمان تضحكي ياقليلة الادب احنا في يوم عرفة ويوم فضيل وتسوي كده وتؤذي المسلمين!!)..من جد استغربت من الموقف وكان نفسي اشوف من اللي بيتهزأ ..لأن مافي في المحل غير أهلي..ماقدرت ادخل الا لمن راح..تتوقعوا كان بيهزيء مين؟؟

بنت خالي اللي في الصف 5 ابتدائي!!!

لدرجة انها صارت تبكي من الخوف..وبعدها كرهته وصارت تدعي عليه ليل نهار..وماتخرج وكل مانزلت السوق تتلفت خايفه لايجيها تاني!!

البنت لابسه عباية بس حاطة الطرحة ع كتفها….

بالله هذا اسلوب رجل دين … وهيئة أمر بالمعروف!!

مالاحظ ان البنت صغيرة؟؟ ماعنده نظر!! غير كده .   . .هذاأسلوب ينصح بيه؟؟

بعدين بصراحة فاجرة وفا سقة هذا قذف كيف اتجرأ وقالها؟؟

ندمت اني خرجت من المحل ولا ماكان سكت له

ماكنت أصدق الحكايات اللي كنت أسمعها عن رجال الهيئة..كنت اقول في نفسي الناس تبالغ وتكرهـ الهيئة عشان كده يسبوهم..لكن بعد اللي شفته ماألومهم أبدا!!!!!!!!!!!!!!

عادات مكاوية في الحج

كل عام وانتو بخير حبايبي ..وسنه حلوا علينا وعليكم وعيدكم لحمة ومعمول وغريبة وعساكم من عواده..

والله يعوده علينا
وعليكم وعلى الأمة الإسلامية بالنصر والتمكين يارب

زي ماوعدتكم إني راح أتكلم عن بعض
عادات الحجازيين في العيد..وأنا اليوم أوفي بوعدي وجايه عشان اكتب لكم..وعزروني
على التأخير ..

بس ربي كتب لي الزيارة وما رجعت إلا أمس..بلاش كترت كلام واسيبكم
تقروا براحتكم

&الخُلِّيف&

يبدأ من يوم عرفة اللي هوا يوم
الوقفة…وكانوا يسموه كده لأنه مايبقى ولا رجال في الحارة كلهم يروحوا يشتغلوا
ولا يحجوا وطبعا الحريم في دا اليوم يروحوا يفطروا في الحرم وبعد الفطور لازم
يخرجوا يدوروا في الأسواق اللي عند الحرم.(.السوق الصغير..حارة الباب وريع
الرسام..وقوز النكاسة..)ويشتروا للبزورة العاب العيد اللي هيا (فوانيس صغيرة وأتاريك
وشراب  وطيران أم شناشن) ويرجعوا على البيت
::وكل تلاته وأربعه عوايل يجلسوا أيام الحج في بيت واحد من الخوف لأنه مافي رجال
غير العجايز الكبار…والتلاته الأيام حقت العيد يسوو

&القيس&

اللي هوا ياحبايبي عبارة عن حفلة تنكرية تتكفل واحده تسويها قدام بيتها ويكون
قدامها برحه كبيرة وارض فاضيه يعملوا القيس فيه.طبعا بدون عبي ولا غطا..واللي تلبس
رجال واللي تلبس غزالة(الغزالة تلبس كرتون مربع ومعاها عصايه خشب ) واللي تلبس
بدويه  ولا ملابس مبهدله ويلطخوا وجيههم
بالفحم والحكل يعني تطلع أقرف شكل وأحسن شكل يضحك ويلبسوا سراويل السنة على
راسهم  ويجلسو يدقوا بالطيران ويرقصوا
ويهييصوا على كيف كيفك والتلاته الأيام كلها على كده وكل حارة لها قيسها وكل
مجموعة قيس يروحوا للقيس اللي في الحارة التانية وهذا كله حريم لوحدهم ولمن يسمعوا
صُفيرة العسًّه(زي العسكري)طيرااااان على بيوتهم لأنه مايصفر إلا إذا فيه شي زي
حرامي ولا شي زي كده…هزا القيس

أما &الجو جو&

فهزا حكايته حكاية..هدا ياحبايبي يسووه للي يحج أول مره..يعني يكون صراره…يكونوا
أهله مستعدين لرجعته بعد الحج ومن يوم مايدخل ينتروا عليه النقل (نوع من أنواع
المكسرات) ويغنوا له جو جو حجوا وجو ويدقدقوا ويطبلوا وفي نهاية الحفلة يسوو قهوة
حلوة (قهوة ملوز)هذا في الحج

&النتيرة&

شكلنا حنسويها لبنت خالي اللي عمرها
5 شهور

النتيره تكون للصراره (اللي أول مره
يروح المدينة) بعد ما يرجع يحطوه في وسطهم فوق شرشف ويرموا فوق راسه النقل
والمكسرات وبعضهم يحطوا فلوس..ويطبلوا ويغنوا أغنية طووووويله عرييييضة…يمكن
انزلها في موضوع تاني عن الأناشيد الحجازية المغبرة قصدي القديمة .

وهذي هيا عادات المكاكوة في عيد الحج

نشوفكم على خير في عادات حجازيه
تانية

وأتمنى أكون وفيت وكفيت

يلا حبايبي كل عام والغريبة والمعمول يجمعكم

واللحمة تزين سفرتكم

مشتاقة :(

ياراحلين إلى منى بقياد
هيجتم يوم الرحيل فؤادي

سرتم وسار دليلكم ياوحشتي
الشوق أقلقني وصوت الحادي

حرمتم جفني المنام ببعدكم
ياساكنين المنحنى و الوادي

ويلوح لي بين زمزم والصفا
عند المقام سمعت صوت منادي

ويقول يانائما جِدّ السرى
عرفات تجلو كل قلب صادي

من نال من عرفات نظرة ساعة
نال السرور ونال كل مراد

تالله ماأحلى المبيت على منى
في ليل عيد أبرك الأعياد

ضحوا ضحاياهم وسال دماؤها
وأنا المتيم قد نحرت فؤادي

لبسوا ثيابا بيضا شارات الرضا
وأنا الملوع قد لبست سوداي

يارب أنت وصلتهم وقطعتني
فبرحمة ياربي فك قيادي

فإذا وصلتم سالمين فبلغوا
مني السلام أهيل ذاك الوادي

قولوا لهم عبدالرحيم متيم
ومفارق الأحباب و الأولاد

صلى عليك الله ياعلم الهدى
ماسار ركب أو ترنم حادي

أشتقت للحج وفاضت دموعي حرقة ولكن..لم يرد الله لي الحج هذه السنة وأبدلني بزيارة حبيبنا محمد صلى الله عليه وسلم

نحو المدينة

إلى اللقاء

مكاوية في الحج

مرحبنبكم حبايبي في بيتي

وعشرة مباركة علينا وعليكم ..والله يتقبل مننا ومنكم صالح الأعمال يارب

ياسلام على مكة هادي الأيام..وياسلام على الزحمة وريحة الحجاج…والله شوفة الحجاج وزحمتهم تبسط الواحد وتسعده…

رحت يوم الخميس حجيت ..عقبالكم <<أحلى حج في يوم واحد بس<<هع

المهم ياحبايبي رحت منى واتفرجت على الخيام ،،والحملات تزبط خيامها وتزينها وكل حملة تنافس التانية

ومرينا طبعا على الشياطين(أعوز بالله منهم) وماشاء الله عيني عليهم بارده ..كل شي متعوب عليييه..حتى الجمرات صارت 4 أدوار، وكل دور فيه درج كهربائي وعايدي..يوصل للدور اللي بعده…واللي بيشتغلوا هناك عاملين حالات استنفار، وكلهم يشتغلوا وهما مبسوطين …فكروني بأهل العريس لمن يعبوا للجواز<<ونعم التشبيه

يابختهم يكسبو أجر خدمة الحجاج..والله لمن شفت الجماعات اللي تشتغل اتحمست بالمرررة إني أشتغل معاهم،،.ياريت نقدر..

المهم خلصنا من منى رحنا على مزدلفة وجلسنا فيها ..وكل واحد فينا يتأمل ويتخيل كيف راح يكون دا المكان بعد كم يوم!!

والله خنقتني العبرة من شوقي للحج-الله يكتبنا منهم يارب-نفسي احج واتنقل من طهر لطهر

هذي ياحبايبي كل الحكاية وهيا تمشية المكاويين قبل الحج…

استنوا فين رايحين؟؟..

أبغى اذكركم واذكر نفسي بفضل دي الآيام -زي منتوا عارفين الليلة أول ليله من ليالي الحج-عسى ربي يتقبل اعمالنا..يارب

فضل عشرمن ذي الحجة

قال رسولنا الحبيب عليه الصلاة والسلام “ما من أيام العمل الصالح فيها أحب الى الله من هذه الآيام ولا الجهاد
إلا رجل خرج بنفسه وماله فلم يرجع من ذلك بشئ”

وهي خير أيام الدنيا

وهي الأيام المعلومات التي شرع الله فيها ذكره قال تعالى”ويذكروا اسم الله في أيام معلومات على مارزقهم من بهيمة الانعام”

وفيها يوم عرفة(يوم الحج الأكبر) ويوم النحر

وفيها تجتمع أمهات العبادات ولاتجتمع في أيام غيرها وهي (الصلاة والصيام و الصدقة والحج)

مايستحب فعله هذه الآيام

الصلاة والتبكير اليها

الإكثار من النوافل والطاعات

الصيام لما ورد عن النبي صلى الله عليه وسلم انه صامها

صيام يوم عرفة يكفر السنة التي قبله والتي بعده لقوله صلى الله عليه وسلم”احتسب على الله أن يكفر السنة التي قبله والسنة التي بعده”

التهليل والتكبير

وصيغه

الله أكبر. الله أكبر. الله أكبر. لا إله إلا الله. والله أكبر. الله أكبر ولله الحمد

الله أكبر. الله أكبر. الله أكبر. لا إله إلا الله. والله أكبر. الله أكبر. الله أكبر ولله الحمد

انتظروا عادات المكاوية في العيد

بالسلامة حبايبي

الفيلم القديم المتجدد

هناك…في تلك البقعة الضيقة..وفي ركن تلك الغرفة البيضاء الصغيرة..ترفل ملامح تلك الطفلة البريئة،،وقد بدا

على وجهها الشحوب ،وغطت ملامحها آثار حزنها وألمها…

وفي ناحية أخرى..تقبع تلك الأسرة المكلومة في أرجاء بيت مظلم في دلجة ليل بهيم لايرون فيه بعضهم ..وقد

اعتراهم الجوع الشديد ..

وفي البقعة المقابلة..نواح أم ثكلى قد أنَّها طول النواح على ابن قد انتشل منها وقتل

أمام عينيها…

شيخ وقور …مكبل الأغلال وقد لعبت في وجهه خطوط الزمن وهموم الحياة..فلا ترى إلاخرائط حزن

واألم ..يتدفق من بينها أنهار مرارة وقهر

صور شتى…وأوضاع مؤلمة..وموت بطيء،،،كل ذلك يرونه يومياً هناك… في تلك البقعة الصامدة في (غزة)..

وفي المقابل ومايؤلم أكثر

حال أمتنا الغافلة في سبات ولهوٍ عميق…شتَّان بين من يعيش في صراع ومرض وفناء،،،ومن يعيش على رقص

ولهو وغناء

أين قلوب الأمة؟!

أين نصرة الأخ المسلم؟!

أين أمة اللمليار؟!

مادورهم في مناصرة إخواننا؟!

أين هيئة حقوق الإنسان كما تدَّعي؟!

يامسلمييين

كفاكم لهوا ً وغفلة ونوم…فالوقت يمضي والعدو يجري…والزمان يدور..ولاندري على من سيكون الدور!!

فالنصرة النصرة حتى لايستشري الأمر -وقد استشرى-

**أيا فلسطين صبراً…فإن وعد الله آتٍ لامحالة…وفرجه قريب..فإذا ضاقت بكم السبل…وفاضت بكم الحيل…فباب

الله مفتوح..وهو القادر على رفع الضر عنكم…

أيها المسلمون

أفيقوا من غفلتكم

فالحرب عشواء على ديننا وليس على فلسطين فقط

“اللهم عجل بنصر الإسلام والمسلمين ،واجمعهم على راية التوحيد والإيمان،واحقن دمائهم،،

إنك سميع مجيب يارب العالمين”

“اللهم آمييين”

انبسطوا يالأجانب..

**لايغركم الموضوع فمضمون التدوينة عكسه**..

تحدثت في تدوينة سابقة عن مشاكل السعوديات المتزوجات من أجانب والعكس ..والآن صدرت توصية من مجلس الشورى مفادها ..إسقاط توصية التخفيف في إجراءات الزواج من الأجانب بعد أن تساوت نسبة المؤيدين والمعارضين

للتفاصيل اضغط هنا

إلى متى حنفضل على دا الحال؟؟

الله أعلم

عاكسني وشوف النهاية

المعاكسات وماأدراك ماالمعاكسات

إنتشرت وتفشت هذه الظاهرة في مجتمعنا بشكل كبير ومُلفت ،،وبشتى الطرق والوسائل،،

لاأريد أن أتحدث هنا عن حكم المعاكسات والحذر من الذئاب ،والأساليب التي تيسرت بها المعاكسة ,,,فكل ذلك قد استشرى وانتشر والكل أرعد وأزبد به

،وأعلن معارضته وتصديه لذلك..ثم ماذا؟؟ لاشيء,,مجرد كلام ورد فعل فوري فقط!

لم نر عقوبة فعلية أو قرار صارم من الممكن أن يخفف من حدة هذه الظاهرة..

إلى متى نسطر المقالات وننقد هذا ونشتم ذاك؟؟(طيب وبعدين)

أتعلمون أن سمعتنا تلطخت في الدول المجاورة بسبب هذه الظاهرة؟! (بُث برنامج شبابي في إحدى القنوات الفضائية، تحدثت فيه فتاة عن عن ملاحقة

شاب سعودي لها لمدة ساعتين متواصلتين لم ييأس لصدها وتجاهلها)  (واعيباه على شبابنا)

أعجبتني كثيرا ماقامت به شرطة “دبي” من عقوبة للحد من ظاهرة المعاكسات ،حيث قامت بنشر صور المعاكسين والتشهير بهم في الصحف

وماشابهه، فانخفضت وتناقصت الظاهرة بنسبة70%

بالنسبة لي أعتبرها فكرة رائدة إذا ماطبقت في مجتمعنا

ماذا عنكم أنتم؟!

معاناة زمـ زمـ

كل منا يعلم الفوائد العظيمة لزمزم، ولاتخفى علينا فوائده وبركته ،والأحاديث الواردة في فضله ، وغير ذلك من

الدراسات والبحوث العلمية التي أذهلت العالم بخواص هذا الماء وفعاليته في علاج الأمراض وحصول البركة ،،

وهذا مأاثبته الطب النبوي منذ قرون مضت!!

لكن أن تستغل هذه النقطة في حرمان الناس منه أو بيعه بأعلى الاسعار!! هذا مالانرضاه ولن نرضى

بجزئه…

ولكنه واقع فعلاً.

فمنذ فترة مضت..ضيق على الناس في تعبئة *زمزم* ..وألغيت بعض الأماكن وأحتكرت في مكان واحد ،وصنابير

المياه ضعيفة جداً (يعني تعبي جالون20لتر في ربع ساعة) مما أدى إلى شدة الزحام عليه ،وبالتالي تعارك الناس

وتطاولهم على بعضهم ،،،إلى أن وصل بهم الأمر الى الضرب بالسكاكين وماشابهه

كل ذلك وصبرنا عليه…وما إن هلَّ علينا هلال رمضان المبارك(أسأل الله العلي القدير أن يتقبل منا صيامنا وقيامنا

وصالح أعمالنا ويتسلم منا رمضان متقبلاً ) حتى ازداد الأمر سوءاً،،، وأصبح من الصعب جداً الحصول على

*زمزم*،،فاستغل الباعة حاجة الناس، واصبحوا يبيعون الجالون الواحد بـ30و50 ريال..بعد ان كان يباع بـ2او5 ريالات

حتى أصبحنا لانستطيع شربه إلا للضرورة تحاشياً لزحام التعبئة

الى متى ونحن نعاني؟؟

إلى متى نحرم من الماء المبارك وفضله؟؟

**خلااااااااااص لحد هنا كفااااااااااااية..نبغى حل لهذه الأزمة ياجماعة**

إلى متى حنفضل نشحذ زمزم_وياليت نلاقيه_

“أسأل الله العلي العظيم أن لايحرمنا من فضله وبركته..وان يبارك لنا في زمزم ولايحرمنا منه ويفرج عنا مانحن فيه”

اللهم آمييين

مبارك عليك

1429-11-8هـ الموافق 6-نوفمبر-2008

بصمة حب في تاريخ حياتها…بصمة تحقق فيها حلمها بإكتمال نصفها الآخر…

تلك هي بصمة أختي العزيزة والغاليةتهاني

حبيبتي تهاني…جف مداد قلمي وشلّ عن الكتابة..وخَفَق نبض قلبي مهنئاً السعادة…وسال دمع فرحي بالحب والزيادة..

وهاأنذا أهنئك ولساني يلهج بالدعاء لك بكل خير …

شادي&تهاني

بارك الله لكما وبارك عليكما وجمع بينكما في خير

أسأل الله أن يجعل ايامكم سعادة وهناء واستقرار

إهداء

أختك

أمــنــيــة

** وعقبال كل العزابية **